Чӑваш Енри 8 шкул вӗренӳ тытӑмӗнчи инноваци пултарулӑхне аталантарма 500 пин тенкӗлӗх грант илӗ. Кунашкал гранта ҫулсеренех параҫҫӗ.
Кӑҫал ку укҫана Шупашкрати 65-мӗш тата 47-мӗш шкулсем, Шупашкарти 1-мӗш гимнази, Ҫӗнӗ Шупашкарти 6-мӗш гимнази, Ҫӗрпӳри 1-мӗш шкул тивӗҫнӗ.
Чӑвашла вӗрентес чи лайӑх практикӑшӑн Ҫӗмӗрле округӗнчи Хутар шкулӗ, Элӗкри И.Я.Яковлев ячӗллӗ шкул, Йӗпреҫ округӗнчи Пучинке шкулӗ грант илнӗ.
Ӗнер каҫхи 7 сехет ҫурӑра Йӗпреҫ округӗнчи Хурамал тата Ҫӗнӗ Выҫли ялӗсен хушшинчи ҫул ҫинче иномарка икӗ хӗрачана ҫапса кайнӑ. Вилмеллех. 2008 тата 2009 ҫулсенче ҫуралнӑ хӗрачасем вырӑнтах вилнӗ. Ҫакӑ паллӑ: вӗсем ҫулпа утса пынӑ.
Иномарка рулӗ умӗнче 1998 ҫулта ҫуралнӑ арҫын пулнӑ. Вӑл ӳсӗр пулни паллӑ.
Ку тӗслӗх тӗлӗшпе пуҫиле ӗҫ пуҫарнӑ.
Етӗрне хулинче пурӑнакан ветеран Иван Ермолаев 105 ҫул тултарнӑ. Иван Васильевич Йӗпреҫ районӗнчи Пысӑк Упакасси ялӗнче колхозниксен ҫемйинче ҫуралнӑ. 1939 ҫулта ӑна салтака илнӗ. Киле таврӑнма ӗлкӗреймен - вӑрҫӑ пуҫланнӑ. Вӑл Чехословакие ирӗке кӑларнӑ ҫӗре хутшӑннӑ. Ҫӗнтерӗве Хемниц хулинче кӗтсе илнӗ. 1946 ҫулта аслӑ старшинана демобилизациленӗ.
Иван Васильевича I степень Тӑван ҫӗршыв вӑрҫин орденӗпе, «Паттӑрлӑхшӑн» медальпе чысланӑ.
Паян япӑх ҫанталӑка пула тӑватӑ округри 9 ялта ҫутӑ сӳннӗ. Пӗтӗмпе 2 пин ытла ҫын электроэнергисӗр юлнӑ.
Ҫутӑ Йӗпреҫ, Канаш, Муркаш тата Элӗк округӗсенчи 1187 кил-ҫуртра ҫук. Ҫынсене электроэнерги парас тӗлӗшпе 8 бригада, 25 ҫын, 8 техника ӗҫлет. Ку ӗҫене ҫитес вӑхӑтра вӗҫлеме шантараҫҫӗ.
Раҫҫейри чи лайӑх вӗрентекенсене хавхалантарӗҫ. Вӗрентекен кунӗ тӗлне вӗсене 200 пин тенкӗ парӗҫ.
Вӗсен йышӗнче - Чӑваш Енри 11 педагог.
200 пин тенке Шупашкарти Татьяна Андреева, Михаил Зыков, Александр Григорьев, Елена Михайлова, Алевтина Калинина, Ирина Диарова, Анжелика Панкратова, Ҫӗмӗрле округӗнчи Татьяна Надеева, Йӗпреҫ округӗнчи Алена Ядрицова, Элӗк округӗнчи Альжбета Краснова, Ҫӗнӗ Шупашкарти Екатерина Владимирова тивӗҫӗҫ.
Республикӑри 10 округ Сосновский пултӑранӗпе кӗрешме хушма укҫа ыйтнӑ. Вӗсен йышӗнче - Улатӑр, Вӑрнар, Йӗпреҫ, Канаш, Куславкка, Комсомольски, Хӗрлӗ Чутай, Етӗрне, Елчӗк, Патӑрьел округӗсем. Вӗсене пӗтӗмпе 4,5 миллион тенкӗ уйӑрса парӗҫ. Ку укҫапа 2,85 тӑваткал ҫухрӑм лаптӑк ҫинчи Сосновский пултӑранне пӗтерме май парӗ.
Палӑртмалла: ҫулталӑк пуҫланнӑранпа ҫак наркӑмӑшлӑ курӑкпа кӗрешме 11,4 миллион тенкӗ уйӑрнӑ.
Шупашкарти 4-мӗш гимнази валли тинех директор тупӑннӑ. Ку вырӑна унччен физкультура учителӗнче ӗҫленӗ Максим Валерьевич Антонов йышӑннӑ.
Палӑртмалла: гимназире 2022 ҫулхи авӑн уйӑхӗнченпе директор ҫук. Унччен директор унта Андрей Михайлов пулнӑ. Максим Валерьевич 1996-2002 ҫулсенче Йӗпреҫ округӗнчи Пысӑк Упакассинчи шкулта физкультура учителӗнче ӗҫленӗ. Кайран Йӗпреҫри 2-мӗш шкулта тӑрӑшнӑ, 2006-2018 ҫулсенче ӑна ертсе пынӑ.
Йӗпреҫ муниципаллӑ округӗнчи Хурамал ялӗнче пурӑнакан Николай Квасов кил-ҫуртне чӑн-чӑн юмаха ҫавӑрнӑ. Мӗн тери илемлӗ! Унӑн килӗ умӗнчен чарӑнса тӑмасӑр иртме ҫук.
Николай Квасов - 76 ҫулта. Кил-ҫуртне илемлетнӗ эрешсене, кӳлепесене вӑл йывӑҫран касса кӑларнӑ.
Йӗпреҫ округӗнчи утарҫӑсем кулянаҫҫӗ: унта пыл хурчӗсем нумай вилеҫҫӗ. Мӗн пулнӑ? Ҫакна вӗсем уй-хире ҫум-курӑка пӗтерекен химикат сапнипе ӑнлантараҫҫӗ.
Ку хыпара «Про Город» хаҫата халӑх корреспонденчӗ пӗлтернӗ, вилнӗ вӗлле хурчӗсене видео ӳкерсе ярса панӑ. Вӑл каланӑ тӑрӑх, пыл хурчӗсем Хурамал ял тӑрӑхне кӗрекен Ҫӗнӗ Выҫли, Чӑрӑшкасси, Хумри Ишек ялӗсенче вилнӗ. Унта пыл хурчӗсен 50 проценчӗ вилнӗ-мӗн. Ҫынсем ҫакӑ рапс уйне пестицидсемпе сапнипе пулнӑ тесе шутлаҫҫӗ. Шӑпах халӗ, утӑ уйӑхӗн 4-5-мӗшӗсенче, сапнӑ-мӗн. Кун пек ӗҫсем туса ирттересси пирки вӗлле хурчӗ ӑстисене юлашки хутчен ҫӗртмен 16-18-мӗшӗсенче асӑрхаттарнӑ-мӗн.
Йӗпреҫ муниципаллӑ округӗнчи Купня тата Ирҫе Ҫармӑс ялӗнче пурӑнакансем ял уявне пухӑннӑ. Кӑҫал вӗсен ҫавра ҫул – ял йӗркеленсе кайнӑранпа 450 ҫул ҫитнӗ.
Вырӑнти ҫынсемпе хӑнасем чӑвашла тумланса тухнӑ, чӑваш халӑх юррисене шӑрантарнӑ, купӑс каласа ташланӑ. Пӗр сӑмахпа, уява пухӑннисен пурин те лайӑх кӑмӑл пулнӑ.
-5.7 °C